ابوذيات رهيبه

خلو علي حراس .. وعيون
ومن دمعي جرى نهرين .. وعيون
شلون خدود عندك ياولف .. وعيون
كبار ويامحلا نظرتهن علية
____________
احبك وغير حبك .. لايلفني
وعسى منامي بعد فركاك .. لايلفني
دخيلك لف شعرك .. لايلفني
حرير ويلعب بين ادي
ـــــــــــــــــــــــــــــــــــــــ
وجب الزاد ياخلي وسم بيه
لصب زرنيخ مشعجب دفتر عشكَنه ماتكَلبه
وليش انت اليكَلبك ماتكَلبه
تره كَلبي بغيابك مات كَلبه
كَلب كَلبي توفه وعم عليه
ــــــــــــــــــــــــــــــــــ
بدمع عيني اكتبلك خاطر انه
وإلك مايوم كاسر خاطر انه
غير أنت تجيني ألخاطر انه
أجيك زحوف متعني أعلة أديه
ـــــــــــــــــــــــــــــــــ
اگوم اجلاللاً الحسنك وقف لك
وسجل گلبي ياخلي وقف الك
وحطك بي واقفلنه وقف لك
وطب بصدري وقفلكم عليه
ـــــــــــــــــــــــــــــــــ
حبك بالضلع بسمار مندك
واحس كلبي يسولف بيك من دك

كمت اركض على الموبايل من دك
لأن أدري العزيز يدك عليه
ـــــــــــــــــــــــــــــــ
وحك من صاغ هندامك وحياك
طلع شريان من كلبي وحياك
أحبك واحترم شخصك وحياك
واحب كلمن وفي ينشد عليه
اعونك وسم بيه.
لأن خنت الصداقه وخنت بيه..
____________
احلى من البدر يا اسمر وصفناك
ولكل مريض انته الدوه وصفناك
يا حافظ الله يسترنه وصفناك
كلي اشتعل من تصفن عليه
_____________
يظل حبك ترى بكلبي علي دين
وعهد للموت ما انساك علي دين
ولولا البعد لمشي لك على ايدين
تفداك الروح ياغالي علية.
___________
شفت شمس وكمر يضوي خلالك
ربك من وجه يوسف خلا لك
تنحه الحسن عن عرشه خلا لك
لأن شافك صبح بوكت المسية.
____________
السعادة منـين اجيبنها والافراح
وعلى الخوان راح اصفن والف راح
الف عدموا والف سجنوا والف راح
واتـاني ومـارجـع واحـد عـلية
___________
كلبي الحبك ابسرعه ورادك
وما عاندك فد مره ورادك
تطير انته وعلي تبعد وردك
اصوفرلك ترد ترجع اليه
_____________
ما أدري شكضه من الليل وشتم
ومن خدك أحوش الورد وشتم
وأعذرك حيل سبني بزعل وشتم
تره شما تشتم ثواب لوالدية
_____________

الدمع نهران بخدودي كراهه
حبيبي سلب من عيني كراهه
ليش امحبتك صارت كراهه
اشبده مني وتشمت اعداي بيه
_____________

الدمع مرات مو بس حزن..يعني
ثكيل وبس عليك الجدم..يعني
على احوالة سألته وكال..يعني
ومعنى اليعني مالك غرض بية
____________
نص احترك من هجرك ونص طاف
وغرك نصي ابحر حبك ونص طاف
يريت المدرسة ترجع ونصطف
وابدلك بالعلم واخذ تحية
__________
عجب مامر عزيز الروح بس لاح
رماني وردت ارد السهم بس لاح
لجيبك لو تصير اليوم بسلاح
وتداوي جروح علاتي الخفيّه
______________
خطف طيف الحبيب وما فياني
وعزم انهض وشبكه مافياني
شكالولك يخايب مافيا اني
سريع تفوت متسلم عليه
_____________
دمع عيني المناشف منشفتهه
غميت وطحت كلي من شفتهه
اخذت العام بوسه من شفتهه
لحد هاي السنه مغمه عليه
_____________
نخيت اني عالبختك منتخطي
عليش بورقه خطك منته خطي
اذا بعيوني اشوفك منتخطي
قسم بالله عيني تحك اديه
______________
حبيبي اكل فلافل ونته باجه
شوكت تكعد كبالي ونتباجه
ولك بسمار كلبي ونته بجه
وبساميرك عوج ردهن بديه
_____________
وكع قلبي بغرامك ماتشيله
وجرح شوك البيه ماتشيله
اخابر وانت تسمع ماتشيله
ولك هالروح ماتحمل اذيه
___________
انا بكاروك حبك وانته هزني
صرت فرصه بحياتك وانته هزني
وانا شجرت محبتك وانته هزني
وخلي الورد يتناثر عليه
____________

وحك الي بضريحه انصار طافت
الديار الهجرهة الولف طافت
شلون انجا وسفينة نوح طافت
اذاامنت الجرف ونهدم بيه
___________
العشك بيه انختم بسمك وتم لك
يمن تامر عرش روحي وتملك
احس الناس جن خدم وتملك
واحسك تامر بروحي عليه

____________
لغيرك ماصفه كلبي ولاحن
نجومك بالسمه سطعن ولاحن
قصيده حروفك اكتبهن والحن
واسوي اسمك نشيد الناصريه

____________
البشر لو مات كلبه ماتشوفه
وضمير الناس جنه مات اشوفه
عسن عين اللي حكلهه ما تشوفه
عمه اسود صابهه لحد المنيه
________
يحن كلبي على حبك من احبك
واخذ زهوة شبابي مني حبك
انشدك ياهو الاكثر مني حبك
حته بهالسهوله تخون بيه
__________
انت الكلب والروح مالك
صرت كلي الك ياترف مالك
تصد عني وتدير الوجه مالك
تعذبني وتحملني الأذية
____________
اريد الدنيا تصفى وياي بس يوم
واشوفك ياكحيل العين بس يوم
تنوح امي عليه وصحت بس يوم
الذنب ذنب الحبيب قاسي عليه
___________
يكلبي بيش اخيطنك والحماك
يجيك الهضم من دمك ولحماك
ولاواحد شكف دونك ولا حماك
شما اسوي اهم عدوان اليه
__________
ياربي لو نخاك العبد عينه
وسيعه وماتحب الكحل عينه
رفع طرف العباية وشفت عينه
شفت ميزان ونجوم وثرية
__________
همومك موعفتهن كتلي شوجن
وهم ماتبت عقلك تسل شوجن
اشزرع كلبي بمحبتك كلي شوجن
جنالي هموم وخبال واذيه

___________
انة الماعرف قدري ولا حد
ولاسهم الكطع جذري ولاحد
اصفن بية كل سبتك والاحد
بس اعرفني شنهي وهاهيه
_________
ما اعشك بعدغيرك ولانتة
لانك ماتحب غيرك ولانتة
لجلك عذبت كلبي ولانتة
تاليهة اطلعت تلعب عليه
___________
وليدي الظيم و انا الصرت اب له
وعگلــي للمهـالـك ســاگ ابـلـه
مــو كـامـل اعـرفـه العـقـل ابـلـه
جـاب الجمـر حطّـه ابّـيـن ايـديـه
_____________
شفتـه وچنّــه دورة بــدر وجـهـه
و نيـران الغضـه بحشـاي وجهـه
يـربـي يالتـوجـه الـكـون وجـهـه
على گلبي الذاب خلّه يحـن عليـه
__________
كضا يومي بحزن وانتظر غادي
وكلبي اعليك مثل النار غادي
باجر من يصير احساب غادي
اشتكل لله على السويتة بية
___________
كبل يفهمني كلبك منك احلى
وانا الما يوم شايف منك احلى
اجيت لرمش عينك منك احلى
سحرني والكحل طاح من ادية
___________
نصحته ولا نفـــع وياه نصحاي
سكاره احنه بهــواه مابعد نصحاي
جفاني وصرت نصي ميت نص حاي
نحيـــل ولا اثــــر نكاد بيه
____________
حبيبي ما تحب النفس بعداك
عديت شحصلت يا ترف بعداك
نخيت الصبر ويه الجان بعداك
وهسه انت الخنت بيه
_____________
وحك ارموشك الحلوه...وعينك
انا بالشده واكفلك...وعينك
لون بيدي لنصبنك...وعينك
ملك تحكم على كل البريه
___________
شجاهه الروح عافت من...وصلها
اظل ارسل واخابر من...وصلها
تظل النفس طيبه من...اصلها
انا الممنون لليسال عليه
____________
تموت الروح يا صاحب بعدكم
وريح المسج ما فاحت بعدكم
ترى يالعزيز شما طال بعدكم
تضل وسط الكلب غالي عليه
___________
نحيل الجسم من بعدك تراني
واريدك دوم بعيونك تراني
افكر بيك كل ساعه تراني
افكربيك والبعد يصعب عليه
__________
رضيت بقسمة الباري محاصيل
ولاعندي ارض وازرع محاصيل

ردت كليه تقبلني محاصل
مسائي والقسط غالي عليه
___________
نبض كَلبي يصيحن حيل بس عود
بنحس عايش ولا فد يوم بسعود
ذبل وردي يناهي وباقي بس عود
بعد ما جان يزهي انكَطع ميّه
_____________
عليك اشكد رجف قلبي وداري
ولجل عينك بعت ملكي وداري
اضن تعلم بـــضيمي وداري
شكد احبك ونت تضحك علية
____________
انة جناح الحزن رفرف منسماي
يموت الموت لو يشرب من سماي
اضن تختض لو تعرف منسماي
واخاف عليك لا تنصدم بية
_____________
عليك اشكد رجف قلبي وداري
ولجل عينك بعت ملكي وداري
اضن تعلم بضيمي وداري
شكد احبك ونت تضحك علية
اوصيك بعد لا تعلة علية
ولا تكابر بنضراتك علية
مو غشيم انت علية
انه اعرفك زين واشبيك ما بيك
اضن ذرة وفة بعد ما بيك
ولو تعلك العشرة شمع بعد ما ابيك
لانك ردي والردي مايوافي
سقيته من دمع عيني ماي وافي
لو يبجيلي طول العمر مايوافي
لان روحي كومة ضيم احملت
مثل هم الي من حرام احملت
ولدت ضيم وانوب هم احملت
جنة ابد ما يريد ينزل حملها
وعفاه القلب شكد جروح منك حملها
السفينه تغرق لو زاد حملها
وانت قلبك جلد وابدما بيه حمية
__________
احبكم اكثر من الكون وانـسة
وعندي الموت اذا يرضيك ونسة
ما فارگ ابد ذكراك ونــسة
واقدم روحي لعيونك هدية
____________
يغص الريج من تجبل وكحلك
والعمر كلة يروح فدوة لكحلك
اشك الكاع لو كالو وكح لك
واجيبة هنا ليذكرك بذية
___________
الك دوم انه اتعنى وصل بيك
وعنادك وين يبن ادم وصل بيك
حبيبي وشايل بجيبي وصل بيك
وباجر بيك انا مطلع هوية
__________
انا بحبك ابد مافد يوم غشيت
وعن كل الشباب النظر غشيت
كعدت يمه وعلية بسكوت غشيت
وكف صاح المدرس غشت علية
____________
عراق انت والك بالروح منصب
وعلى فركاك دمعي منصب
عسى موتي قريب وقبري من صب
ولا اسمع خبر عنك اذيه

__________
احبك واعتذر منك وناسف
جمال البروحك مغربل وناسف
احط بروحي تي ان تي وناسف
وافجر روحي لو تزعل عليه
___________

انة الشديت جرحك ليش حليت
وعلي حلة الطلاب حليت
ذكرتك بمتحان وغلط حليت
شجاوب وانتة شاغل حتى ادية
__________
عليت وما اظن شخصك علاني
لان بس فركاك يا صاحب علاني
ازعلك اني ما اكدر على اني
اذا زعلتك انة ازعل علية
___________
غزال ايكول ماخذ شمرة منك
وعسل صافي اشحلاتك شمرة منك
تجي ساعات حنظل شمر منك
اجرعنك وكول اتحن علية
_________-
عليكم من سلام الله ورحمة
حن على هل الكلب مرة ورحمة
اذا رايد اجر انت ورحمة
تعال انطيني بوسة وحن علية
____________
يهل ناديت بسمي هواي عيدة
ويهل ماخذ دليلي وياك عيدة
الكلب مو بس بعد رمضان عيدة
انا عندي العيد من نكعد سوية
___________
عشرتك صدك روحي ما تملهة
وكلبي ايام سعدك مات املهة
اريد انصب لروحي ماتم الهة
واشوفك هم تجي وتبجي علية
_________
جفن هالعين من فركاك كوطر
واخذ كلبي العكل وياه كوطر
تعال ارجعلي شوف شلون كوطر
خلافك كل جزء مني بزويه
__________
جيت انشد ليالي هواج عتاب
واغني بونة من الروح عتاب
يصيح الكلب ويه غناي عتاب
احبنج واظل حد المنيه
___________
صدك راح اعذبنك وهملك
وبعد مااركض الجيتك وهملك
بعد ميفيدك انحيبك وهملك
لان حبك دغش كلة رديه
___________
عشكتة ورفضوا اهلي شيعوني
وعلى قبلة يهودي شيعوني
صفت بس الجكارة شي يعوني
على حب الشعر والابجديه
___________
تهذبنا بهواكم وانتهينه
وادور هناك عنك وانت هينه
الكلب بيدك يغالي وانت هينه
تهين وتأمر وتنهي عليه
____________
غالي الدهر بجفاكم بلانه
وقدر مكتوب من الله بلانه
شلون اتنام يالغالي بلانه
وحنه سنين عشرتنه سويه
_________
يفز مثل الكَة كَلبي منشفاه
وعسل يالجان مشروبي من شفاه
عسه كلمن كَطع شفي من شفاه
بمرض لا للشفه ولا للمنيه
__________
وسفه الوكت عنك لهانه
واذا حبك حبر هايج له انه
صرت ملفوف جني لهانه
شفتك والخجل بين عليه
___________
اليحبونك بصدك لا تسلهم
وابد عن سبب حبك لا تسلهم
امن احجي وياك عفيه لا تسلهم
احس تاخذ الروح بغير جيه
___________
حبك بالكلب غالي وشلته
ودمعي بيوم هجرانك وشلته
احب كلبك وصحبانه وشلته
واحبك حيل يالمبعد عليه
___________
يكر بيه العشك شكدر شكر بي
وكتاب من الصبر عندي شكر بي
شورطني وبست خدك شكر بي
بستة ومرض سكر صار بيه
____________
سرح شعرك تهدل صوبي وانساب
وطفح دمعك على الوجنات وانساب
اسألك ياهو گلي وياك وانسب
وتجازي افعالي الطيبه برديه
__________
امفارك والليالي اسنين مرن
وعلي صاير لذيذ الزاد مرن
طفر قلبي على النقال من رن
حسبت الروح هي اترد علية
___________-
انه الانحب عليهم ليل ونهار
و لجلهم دوم اسب بالروح ونهار
عفه للحين ما جنيت ونهار
صلف ظليت عقلي ابين اديه
___________
مريض وصعدت امراضي على شفاي
وطب لندن فلا يكـدر على شفاي
حبيبي من تحط شفتك على شفاي
اطيب ومايضل كل مرض بية
___________
احبكم واحب ميتكم وحيكم
وجثير افرح ابطارشكم وحيكم
متى اوصل منازلكم وحيكم
وشوفنكم ابعيني وهاي هيه
___________
وحك القاب والقوسين ودنه
الغيرك مايلف ويدور ودنه
اكربلك ردت بخطاي ودنه
لاجن تبتعد عني بردية
___________
سهم نابت بلب حشاي ماضي
وعلى كتلي بهواه المحب ماضي
عشرتي وياك صارت فعل ماضي
وصفت لليوم حاضر بالاذية
__________
تمر وعلي ساترهه بختهه
حچت ونار البگلبي بختهه
بخت من كال بدلهه بختهه
شلون الذهب والفضة سوية
__________
بجت روحي بتوالي الليل ونعت
وتذكرت الزمان الفات ونعت
جنت مهيوب هسة اندفع ونعت
تمنيت الموت ولايصير الصار بية
__________
الكلب عاف البشر كلها والك راد
مشى وسافر تذكركم والك راد
عرب ما طيبوا علتي ولاكراد
دواي انت يهل مبعد علية
____________
يصاحب لاتظن مسرور بعداك
وعسى سم الزهر يندار بعداك
شيطفي الكلب من نار بعدك
يطفيها الوكت من ترد اليه
___________
بيدي بكيفي اطشرنك ولمك
ولاابوك العلي يلحك ولمك
اذن حقي انه اعتب ولومك
عليك اعتب لانك خنت بيه
__________

عليك المات والحي سائل انه
صلب لاكن لربعي سائل انه
وكفت اباب بيتك سائل انه
وذا ماتجي هم اسئل عليه
__________
على كبري ردت تذكار خطك
لان احلى من العسل يهواي خطك
ذبحنى شما ادك مشغول خطك
صفى بس المسج ساتر علية
___________
كافي من الالم ولك بس
كلبي ما عشك غيرك ولك بس
من هجرك صحت بألم ولك بس
تصد ليش يالغالي علية
______________
جمالك زاد عن يوسف وقبله
وغرامك صار الي معبد وقبله
خدك لو الزمنه واقبله
اظل ساعات ما اعوفه من ايديه
______________
بغرامك تيهت اصلي وجدي
لان ماتعرف مزاحي وجدي
اباب اهلك لريد اكعد واجد
بلكت ينكسر كلبك عليه
____________
الفرح ماضن اجه للروح بسط
وعلى ظهري تدك دنياي بسط
الوكت بعضاي يم عداي بسط
وحاجه بربع ضل يبيع بيه
___________
قسيت اوياك يسمر عمي أنا
وعين الماتشوفك عمي أنا
إذا خالك فزع لك عمي أنا
تبرى أوضحك الوادم عليه
__________
حبيبي الشوك لا تكطع وصاله
الك بالكلب كم غرفه وصاله
نجوى تروحلك فدوه واصاله
ولجل عينك لطيفه التونسيه
___________
تنام الناس نص الليل وناي
أون محد سمع ياناس وناي
تعال أسمع لحن هالروح وناي
تعال وشوف حالي اتحن عليه
__________
احبك من زمن جدك وجـــدي
وحب كلبي الك ثابت وجـدي
اريد اوكف انه ابابك وجدي
بلكن ينكسر كلبك عليــه
___________
طعم حبك يمحبوبي شفانة
تشابكنة ولا واحد شفانة
تتذكر من سوى طبكن شفانة
سكرنة وللارض طحنة سوية
__________
العمر ماي وتبدة غفل وانجب
وصفيت اعثر واطيحن وكع وانجب
الوكت من زمخ كتلة انلصم وانجب
وخزرتة بغيض من عاين علية
___________
جمالك مو ملك احد فلك بيك
وانتة لكل فلك شاهد فلك بيك
من اكظنك اريد العب فلك بيك
يهودي وكظ فلسطيني بزوية
______________

اريد انشد شعر فصـحـى و شعـبي
و اشـيد بشيمة اجدادي و شعـبي
و اخبر كل شعر عنهم و اشـع بي
و أگـول اشعارهـم و الابوذيــة
ـــــــــــــــــــــــــــــــــــــــــــ
علي دوم الليالي تـــلف ودور
والأجلك رخصيت الذهب والدر
احبك من زمان الدار ولــدور
شعجب لم كبرنه تخون بيـه
ـــــــــــــــــــــــــــــــــــــــــ
الوكت شبه التبستر بستراني
وايردك بس تجيني بس تراني
صحيح اني مؤدب بس ترى اني
البيه ايعيل احرك شيب ابيه
ـــــــــــــــــــــــــــــــــــ
سلالتك نسب يوسف نسبها
والدنيا بغير نظراتك نسبها
جمال الناس مية بالمية نسبها
وبس نسبة جمالك سبعمية
سبحانة كمل بعد فوك السبعمية
رش على كلبك طيب وعالروح حنية
وانطاك واهس طفل وعيون حورية
بس عافك بليا بخت وورطك بيا
ــــــــــــــــــــــــــــــــــــــــــــــــــ ـــــــــــــ
يا مــــــن نسيت الذي بعمرة ألك .. خاطره
بالجذب مـــــــــا مر على بالك أبد .. خاطره
وأني بدموع الهجــــــــر كاتب ألك .. خاطره
صدكني هذا الكلب غيــــــرك أبد.. ما هوة
ضل عالي علو النجم حبـــــك أبد.. ما هوة
بالله أرد أسئلك عن الســـــــبب .. ما هوة
الشايل حنينه الك ليش كســـرت .. خاطرة
ــــــــــــــــــــــــــــــــــــــــــــــــــ ـــــــــــ
عليك دموعي ســالن .. من يراهن
نجومي بعـــــيد راحن .. من يراهن
أعذب الروح لجـــــلك .. من يراهن
تموت الروح من تبعد عليـــــــــــه
ــــــــــــــــــــــــــــــــــــــــــــــــــ ـــــــــــ
يا صاحــــــــبي مني سلام وتحيات
لكم يا مــــــن على الطيب تمشون
يا صاحـــــــبي مني الوفا لك بالذات
يكفـــــــي انا طول العمر لك مديون
حب الكـــلام يموت لو عاش لحظات
وحب الكلوب يعــيش لو كان مدفون
ــــــــــــــــــــــــــــــــــــــــــــــــــ ـــــــــــ
انه متاني الورد .. بخدودك الحـــــــــــــــــــــلوات
أظل شمعه وعلى دروب الليالي أبشوك منتظرك
وأظل انطر شمس وجهك بالعـــــــــــــــــــــــيون
وانه شما طال ليلك أحلم بفــــــــــــــــــــــــجرك
يتمثال الحظر يهلال يوم العــــــــــــــــــــــــــــيد
يوردة وهل الورود أتغار من عـــــــــــــــــــــــطرك
اذا مهرك عمر كل العمر يفــــــــــــــــــــــــــداك
وشلي بالروح اذا ما ترخص المـــــــــــــــــــهرك
ــــــــــــــــــــــــــــــــــــــــــــــــــ ــــــــــــــــــــ
منو يا هـــــو اليصفلك .. حالي فنه
ألم واحـــــــــزان عمري .. حالفنه
اذا ينساك كلـــــــــبي .. حالف انه
أكطعه وداعـــــــــــــتك بأثنين أديه

ــــــــــــــــــــــــــــــــــــــــــــــــــ ـ
وغيرك لاتكول النظر مندار
روحي فراش إلك والكَلب مندر
إذا مو كَطن اصلي اعتب عليه
ــــــــــــــــــــــــــــــــــــــــــــــــــ ـــ
روحي هم مثل روحك بها ون
تدور عالفرح كَاعد بهاون
عشت عمري مثل كَهوه بهاون
يدكَ والنار عين إله عليه
ــــــــــــــــــــــــــــــــــــــــــــــــــ ـــ
تدري شكَد إلك كَلبي ولع ظام
إصغار جروحي يهونك ولِعظام
أموتن وأندفن وأعتكَ ولعظام
تحتلك زحف لو صحت ليه
ــــــــــــــــــــــــــــــــــــــــــــــــــ ـــ
يالبهمك ملابس لابستني
وثوب الحزن بيدك لَبَستني
رحتلاصالحتني لابستني
ولاكَتلي بجذب حقك عليه
ــــــــــــــــــــــــــــــــــــــــــــــــــ ـــ
نشدت الناس عنك وانت هينه
وعلى فراكك تلفنه وانتهينه
كَلبي انته التعذبه وإنته هينه
ويظل اسمك حلو وغالي عليه
ــــــــــــــــــــــــــــــــــــــــــــــــــ ـــ
ديج الفرح أبد مايوم كاكه
وبوري الحزن ماقفل يوم كاكه
إذا هذا العراق يحكمه كاكه
لعد من ؟؟؟؟ تنحل القضيه
ــــــــــــــــــــــــــــــــــــــــــــــــــ ـــ
فرصه انطيني ومهلني لعلمك
أخاف اتكَول ماأدري لِعلمَك
أنا الساريه الواكَفه لعَلَمَك
من اطيح اتطيح خركَه على الوطيه
ــــــــــــــــــــــــــــــــــــــــــــــــــ ـ
أتعارك ياحلو لجلك وأطكَ طَكَ
وللحساد أذب حرمل وأطَكَ طِكَ
أفرح من تراسلني وأطكَ طكَ
وأطكَ اصبعتين من تسأل عليه
ــــــــــــــــــــــــــــــــــــــــــــــــــ
مرتب ما شفت مثلك ولا صاك
ياهو الخلبصك عكَبي ولاصك
انا الما كاتل بأيدي ولا صاك
بحبك صرت أصك بثنين اديه
ــــــــــــــــــــــــــــــــــــــــــــــــــ ـــ
حبيبك لا حلو أصلاً ولا صاك
إجاك وخربط احوالك ولاصك
مبين ماتعرف تصك ولا صاك
دجرب بيه صكه وهاي هيه
ــــــــــــــــــــــــــــــــــــــــــــــــــ ـــ
ياليل متى تردنه لهلنه
المصايب والزمن عنهم لِهَنه
لوندري عذاب إحنه لَهلنه
نموت وما نحملهم أذيه
ــــــــــــــــــــــــــــــــــــــــــــــــــ
حلاوه وطيب للياكل تَمرنه
ويضل نافذ علامك من تمرنه
تميل البصره كلهه من تمرنه
وشط العرب ياخذلك تحيه
ــــــــــــــــــــــــــــــــــــــــــــــــــ ـــ
دارميات
ــــــــــــــــــــــــــــــــــــــــــــــــــ ـــ
متوسط انته الروح وبنصهه غافي
كل البشر مغشوش بس انته صافي
ــــــــــــــــــــــــــــــــــــــــــــــــــ ـــ
اكَعد وافكر بيك وانسه امتحاني
أشرب نفط بهواك حسبالي شاني
ــــــــــــــــــــــــــــــــــــــــــــــــــ ـ
من طبعي احن للزين وبروحي افديه
لو ماتشيله الكَاع بعيوني اخليه
ــــــــــــــــــــــــــــــــــــــــــــــــــ ـــ
دوم آنه ازامط بيك يابرنو الضيج
ويوم الكلافه أعدال حزمة تفافيج
ــــــــــــــــــــــــــــــــــــــــــــــــــ ـــ
خَدك طعم جكليت والشفه حلقوم
حبك صعد للراس خلاني ماكَوم
ــــــــــــــــــــــــــــــــــــــــــــــــــ ـــ
كَتلك تفضل فوت كل قصدي للبيت
شمالك دفعت الباب وبكَلبي طبيت
ــــــــــــــــــــــــــــــــــــــــــــــــــ ـــ
دوم آنه اسولف بيك يالترفع الراس
الدنيا كلهه بخير لو مثلك الناس
ــــــــــــــــــــــــــــــــــــــــــــــــــ ــــــــ
لاتسأل المتاك اسال جروحه
تلكه الجواب يكول بس انت روحه
ـــــــــــــ.......................ــــــــــــــ ــــــــ
__________________